Trúnaðarmannafræðsla
Trúnaðarmenn Eflingar eru mikilvægur hlekkur í starfi félagsins og kappkostað er að bjóða þeim uppá fyrsta flokks fræðslu þar sem tekið er á grundvallarþáttum vinnumarkaðarins.
Stutt hagnýt námskeið fyrir trúnaðarmenn eru haldin með reglulegu millibili. Þar eru mjög fjölbreytt efnistök og alltaf eitthvað nýtt og spennandi í boði fyrir trúnaðarmenn.
Einnig eru haldin sértækari námskeið fyrir þá sem hafa lokið grunnámskeiðum og eftir því sem ástæða er til. Trúnaðarmenn eiga samningsbundinn rétt til að sækja þessi námskeið án launaskerðingar en þurfa að sækja námskeiðin í samráði við yfirmann sinn.
Námskeið fyrir trúnaðarmenn Eflingar á opinberum og almennum vinnumarkaði eru kennd í fjórum hlutum. Á hverju námskeiði er boðið upp á morgun- og hádegisverð og síðasta daginn er haldin útskriftarhátíð með veitingum þar sem nemendur eru leystir út með gjöf og tekin er hópmynd.
Til að skrá sig á námskeið þurfa trúnaðarmenn að senda tölvupóst á efling@efling.is eða hringja í síma 510 7500. Öllum trúnaðarmannanámskeiðum hefur verið frestað til haustsins v. sóttvarnartakmarkana vegna Covid19.
Trúnaðarmannanámskeið – 1. hluti
Trúnaðarmenn kynnast starfsemi stéttarfélagsins, svo sem launakröfugerð, vinnustaðaheimsóknum, skipulagi félagsins og starfsmönnum þess. Farið er vel í túlkun kjarasamninga, réttindi í sjóðum Eflingar, undirstöðuatriði í samtalstækni, lestur launaseðla og launaútreikninga.
Trúnaðarmannanámskeið – 2. hluti
Fjallað er um hvernig hægt er að virkja samstarfsfólk og auka samtakamátt starfsfólks á vinnustað. Hlutverk Eflingar og ASÍ eru í brennidepli auk samskipta á vinnustað og vinnuréttar. Farið verður sérstaklega yfir lög um fæðingar- og foreldraorlof, atvinnuleysistryggingar, hópuppsagnir og hvað gerist þegar fyrirtæki verða gjaldþrota.
Trúnaðarmannanámskeið – 3. hluti
Nemendur kynnast grunnatriðum Vinnueftirlitsins, störfum þess, lögum og reglugerðum um vinnuvernd ásamt kjarasamningsákvæðum. Nemendur fá fræðslu um hvað felist í kynferðislegri áreitni og einelti og hvernig eigi að bregðast við slíkum brotum á vinnustað. Farið er í áhrif sjálfstrausts í samskiptum og lögð áhersla á að trúnaðarmenn læri að setja mörk. Í lokin eru öll helstu hugtök hagfræðinnar eins og kaupmáttur, vísitala, verðbólga og þensla hagkerfis útskýrð á mannamáli.
Trúnaðarmannanámskeið – 4. hluti
Farið er í grunnatriði samningagerðar, hvernig hún er notuð við úrlausn mála sem koma inn á borð trúnaðarmanna. Nemendur fá þjálfun í framsögu og umræðum á vinnustaðafundum, fundarsköpum og frágangi fundargerða. Farið er yfir virkni lífeyrissjóðakerfisins sem er nytsamlegt fyrir þá trúnaðarmenn sem vilja taka þátt í stjórnum lífeyrissjóða.
Boðið er upp á námskeiðin á íslensku og ensku. Einnig er boðið upp á túlkun á pólsku.
Öllum trúnaðarmannanámskeiðum hefur verið frestað til haustsins v. sóttvarnartakmarkana vegna Covid19.
Kennsludagar: Þriðjudagur, miðvikudagur og fimmtudagur frá kl. 8:45–15:15.
Staður: húsnæði Eflingar, Guðrúnartúni 1, 4. hæð.
Í ljósi samkomutakmarkana vegna Covid19 fer kennslan ýmist fram rafrænt eða í húsnæði Eflingar, Guðrúnartúni 1, 4. hæð, eftir stöðunni hverju sinni. Trúnaðarmenn eru látnir vita með tölvupósti fyrir námskeiðið með hvaða hætti kennslan verður.
Námskeiðin eru trúnaðarmönnum Eflingar að kostnaðarlausu.
