Fagnámskeið

Fagnámskeið í umönnun eru fyrir starfsfólk sem sinnir umönnunarstörfum, til dæmis við að aðstoða aldraða, fatlað fólk eða einstaklinga með heilsubrest á heimilum eða stofnunum. Námið er hagnýtt og byggir á verkefnum sem nýtast beint í starfi.

Um námskeiðin

Á námskeiðunum er meðal annars fjallað um:

• aðstoð og umönnun við athafnir daglegs lífs
• samskipti og sjálfstyrkingu
• vinnustaðamenningu
• eldhússtörf og ræstingu
• skyndihjálp og líkamsbeitingu

Námið styður þátttakendur í að efla faglega færni sína og takast á við verkefni í starfi með auknu sjálfstrausti.

Uppbygging náms

Fagnámskeið í umönnun eru tvö námskeið:

Fagnámskeið I – 95 klukkustundir

Fagnámskeið II – 95 klukkustundir

Samtals eru námskeiðin 190 klukkustundir og þarf að ljúka fyrra námskeiðinu áður en farið er á það seinna.

Fagnámskeiðin eru undanfari náms í félagsliðagátt / félagsliðabrú.

Kennsla

Kennsla fer fram hjá Mími, Höfðabakka 9.

Kennt er virka daga síðdegis (kl. 12:40–16:00) og námsmat byggir á mætingu og virkni í tímum. Nauðsynlegt er að ná 80% mætingu til að ljúka námskeiðinu.

Kostnaður

Efling greiðir námskeiðsgjaldið fyrir félagsmenn sem starfa hjá opinberum launagreiðendum.

Skráning

Næstu námskeið eru auglýst neðst á síðunni í viðburðastiku Eflingar. Smelltu á námskeiðið til að sjá nánari upplýsingar og fara í skráningu.

Fagnámskeið fyrir starfsfólk leikskóla eru fyrir þá sem starfa í leikskólum og vilja efla þekkingu sína í starfi með börnum. Námið er sérstaklega ætlað starfsfólki sem hefur ekki lokið formlegu framhaldsskólanámi. 

Um námskeiðin

Á námskeiðunum er bæði lögð áhersla á persónulega færni og faglega þekkingu í starfi með börnum. Meðal námsþátta eru:

• sjálfstyrking og samskipti
• námstækni og færnimappa
• uppeldi leikskólabarna
• þroski og þróun barna
• listastarf með börnum
• fjölmenningarlegur leikskóli

Námið styrkir þátttakendur í starfi og styður þá í að halda áfram í námi.

Uppbygging náms

Fagnámskeið fyrir starfsfólk leikskóla eru tvö námskeið:

• Fagnámskeið I – 70 klukkustundir
• Fagnámskeið II – 70 klukkustundir

Þátttakendur þurfa að ljúka fyrra námskeiðinu áður en þeir fara á það seinna.

Námskeiðin eru undanfari náms í leikskólaliða- og stuðningsfulltrúabrú. 

Kennsla

Kennsla fer fram hjá Mími, Höfðabakka 9.

Kennt er virka daga frá 8:30-15:30 og námsmat byggir á mætingu og virkni í tímum. Nauðsynlegt er að ná 80% mætingu til að ljúka námskeiðinu. 

Námskeiðin eru kennd á íslensku.

Kostnaður

Námskeiðin eru að fullu greidd fyrir félagsmenn Eflingar sem starfa í leikskólum.

Skráning

Næstu námskeið eru auglýst neðst á síðunni í viðburðastiku Eflingar. Smelltu á námskeiðið til að sjá nánari upplýsingar og fara í skráningu.

Fagnámskeið í eldhúsi og mötuneytum eru fyrir starfsfólk sem vinnur við matreiðslu eða þjónustu í mötuneytum og eldhúsum. Markmið námskeiðanna er að efla faglega þekkingu og færni í starfi og skapa tækifæri til frekari menntunar á sviði matvæla- og veitingagreina.

Um námskeiðin

Á námskeiðunum fá þátttakendur bæði fræðilega og verklega þjálfun sem nýtist í daglegu starfi í eldhúsi og mötuneyti.

Á fagnámskeiðum I og II er meðal annars fjallað um:

• samskipti og þjónustu
• tölvunotkun
• hreinlætisfræði og matvælaöryggi
• næringarfræði
• matreiðslu á grænmetisfæði

Á fagnámskeiði III er lögð sérstök áhersla á:

• matseðlagerð
• matreiðslu fyrir grænkera og vegan
• matreiðslu fyrir fólk með ofnæmi og óþol

Námið og framhaldstækifæri

Nám á fagnámskeiðunum er metið til eininga í námi í matvæla- og veitingagreinum, meðal annars í námi matsveina og matartækna.

Kennsla

Kennsla fer fram í Menntaskólanum í Kópavogi.

Námskeiðin eru kennd á íslensku og þátttakendum stendur til boða íslenskustuðningur, þar sem farið er yfir orðaforða tengdan námsefninu hverju sinni.

Kennslutími er amennt 16:30-19:30 en þegar verkleg kennsla fer fram getur kennslutími verið til kl. 20:00.

Kostnaður

Námskeiðin eru ætluð félagsmönnum Eflingar sem starfa í eldhúsum og mötuneytum og greiðir Efling námskeiðsgjaldið fyrir sína félagsmenn.

Skráning

Næstu námskeið eru auglýst neðst á síðunni í viðburðastiku Eflingar. Smelltu á námskeiðið til að sjá nánari upplýsingar og fara í skráningu.

Dyravarðanám er starfstengt námskeið fyrir starfandi dyraverði og þá sem hyggjast starfa við dyravörslu. Námið hentar einnig starfsfólki á hótelum og veitingastöðum, til dæmis þeim sem vinna næturvaktir. Markmið námskeiðsins er að efla færni og þekkingu þátttakenda í starfi.

Um námskeiðið

Námskeiðið er haldið í samstarfi Mímis, Lögreglunnar á höfuðborgarsvæðinu og Reykjavíkurborgar.

Á námskeiðinu er meðal annars fjallað um:

• ábyrgð og hlutverk dyravarða
• brunavarnir
• skyndihjálp
• fjölmenningu
• kynningu á neyðarmóttöku fyrir þolendur kynferðisofbeldis
• sjálfsvörn

Dyravarðaskírteini

Þátttakendur sem ljúka námskeiðinu geta sótt um dyravarðaskírteini sem Lögreglan á höfuðborgarsvæðinu gefur út. Skírteinið gildir í þrjú ár.

Til að geta fengið skírteini þurfa þátttakendur einnig að uppfylla eftirfarandi skilyrði:

• vera að minnsta kosti 20 ára
• hafa hvorki fíkniefna- né ofbeldisbrot á sakaskrá síðastliðin 5 ár

Kennsla

Kennsla fer fram hjá Mími, Höfðabakka 9.

Kennt er mánudaga, þriðjudaga og miðvikudaga frá kl. 16:30–21:30.

Til að ljúka námskeiðinu þarf að ná a.m.k. 80% mætingu.

Kostnaður

Félagsmenn Eflingar geta sótt um styrk úr fræðslusjóði Eflingar til að greiða námskeiðsgjaldið.

Skráning

Næstu námskeið eru auglýst neðst á síðunni í viðburðastiku Eflingar.

Félagsliðabrú er fyrir fólk sem starfar við umönnun, til dæmis á hjúkrunarheimilum, í heimaþjónustu eða við heimahlynningu. Námið er einingabært og kennt samkvæmt aðalnámskrá framhaldsskóla.

Um námið

Markmið námsins er að efla þekkingu, færni og fagkunnáttu þeirra sem sinna einstaklingum sem þurfa aðstoð við athafnir daglegs lífs eða sérhæfða þjónustu.

Félagsliðar starfa meðal annars við:

• félagslega endurhæfingu
• virkniúrræði
• stuðning við fólk vegna veikinda, öldrunar eða fötlunar

Lengd náms

Hjá Mími ljúka nemendur 4 önnum af 6.

Til að útskrifast sem félagsliðar ljúka nemendur síðustu tveimur önnunum í framhaldsskóla.

Námið hjá Mími jafngildir 86 framhaldsskólaeiningum.

Inntökuskilyrði

Námið er ætlað einstaklingum sem:

• hafa náð 22 ára aldri
• hafa minnst 3 ára starfsreynslu við umönnun
• hafa lokið 190 klst. starfstengdum námskeiðum, til dæmis fagnámskeiðum I og II í umönnun

Hægt er að fá hluta námsins metinn í gegnum raunfærnimat.

Kennsla

Kennslan er blanda af fjar- og staðnámi.

Hver áfangi er kenndur í 4 vikur.

• skyldumæting í upphafi og lok áfanga
• kennsla og vinnustofur á Teams
• verkefnavinna og fyrirlestrar á netinu

Nemendur fá reglulega endurgjöf á verkefni og námsframvindu.

Námið er kennt á íslensku.

Kostnaður

Námið er að fullu greitt fyrir félagsmenn Eflingar sem starfa við umönnunarstörf.

Skráning

Skráning fer fram á vef Mímis. Starfsfólk Mímis svarar spurningum um umsóknarferlið.

Leikskólaliða- og stuðningsfulltrúabrú er fyrir starfsfólk í leik- og grunnskólum sem vill efla faglega þekkingu sína í starfi með börnum. Námið er einingabært og kennt samkvæmt aðalnámskrá framhaldsskóla. Að námi loknu útskrifast þátttakendur sem leikskólaliðar og stuðningsfulltrúar. 

Um námið

Í náminu öðlast nemendur þekkingu og færni til að starfa með börnum og unglingum í námi og leik. Áhersla er meðal annars lögð á:

• uppeldisfræði
• sálfræði
• skapandi starf
• mikilvægi leiks í námi og þroska barna

Lengd náms

Námið er 66 framhaldsskólaeiningar og er kennt á fjórum önnum.

Inntökuskilyrði

Brúarnámið miðast við að þátttakendur hafi:

• að minnsta kosti 3 ára starfsreynslu í leik- eða grunnskóla
• um 140 klukkustundir af starfstengdum námskeiðum, til dæmis fagnámskeið I og II

Hægt er að fá fyrri reynslu og þekkingu metna í gegnum raunfærnimat.

Kennsla

Námið fer fram í blönduðu fjar- og staðnámi með stuðningi reyndra kennara.

• 1 laugardagur í mánuði kl. 9–15 hjá Mími, Höfðabakka 9
• 2–3 mánudagskvöld í mánuði kl. 17–21 á Teams

Nemendur hlusta á fyrirlestra heima, taka þátt í umræðum á netinu og vinna verkefni á milli tíma.

Kostnaður

Efling greiðir námið fyrir félagsmenn sem starfa í leik- og grunnskólum.

Skráning

Skráning fer fram í gegnum vef Mímis. Starfsfólk Mímis svarar spurningum um umsóknarferlið og veitir nánari upplýsingar.

Framhaldsnám félagsliða um heilabilun er ætlað félagsliðum sem vilja dýpka þekkingu sína á stuðningi og umönnun einstaklinga með heilabilun.

Um námið

Í náminu er fjallað um þarfir og aðstæður einstaklinga með heilabilun og hvernig best er að styðja við þá í daglegu lífi.

Meðal námsþátta eru:

• einkenni og algengi mismunandi heilabilunarsjúkdóma
• samskipti við einstaklinga með heilabilun
• samskipti við aðstandendur
• hlutverk og þjónusta hagsmunafélaga
• vettvangsferðir og verkefni tengd starfi

Kennslan byggir á fyrirlestrum, umræðum, myndböndum og öðru námsefni frá leiðbeinanda.

Kennsla

Kennsla fer fram hjá Mími, Höfðabakka 9.

Námið er 38 kennslustundir og kennt er í staðnámi.

Kostnaður

Námið er ætlað félagsliðum innan Eflingar og greiðir Efling námskeiðsgjaldið fyrir sína félagsmenn.

Skráning

Næstu námskeið verða auglýst neðst á síðunni í viðburðastiku Eflingar.

Framhaldsnám félagsliða um fötlun og geðraskanir er ætlað félagsliðum sem vilja efla þekkingu sína á stuðningi við einstaklinga með mismunandi skerðingar og geðrænar áskoranir.

Um námið

Í náminu er lögð áhersla á að auka skilning á aðstæðum og þörfum einstaklinga með fötlun og geðraskanir og styrkja faglega færni í starfi.

Meðal námsþátta eru:

• sérkenni og algengi fötlunar og geðraskana
• samskipti við þjónustunotendur og aðstandendur
• réttindagæsla fatlaðs fólks
• hlutverk og þjónusta hagsmunafélaga
• skipulögð vinnubrögð og sjónrænt dagskipulag
• notkun rofabúnaðar og tölva
• kynning á þjónustuforminu NPA

Farið er í vettvangsferðir og unnið með verkefni sem tengjast starfi þátttakenda.

Kennsla

Kennsla fer fram hjá Mími, Höfðabakka 9.

Námið er 38 kennslustundir og kennt er í staðnámi.

Kostnaður

Námið er ætlað félagsliðum innan Eflingar og greiðir Efling námskeiðsgjaldið fyrir sína félagsmenn.

Skráning

Næstu námskeið verða auglýst neðst á síðunni í viðburðastiku Eflingar.