Fréttir

Sendinefnd frá Eflingu tók þátt í samnorrænni ráðstefnu stéttarfélaga öryggisvarða í Korpilampi í Finnlandi dagana 14.-17. september síðastliðinn. Á ráðstefnunni komu saman félagsmenn, trúnaðarmenn, starfsmenn og forystufólk úr félögunum, en þau eru öll aðilar að bandalaginu SUN. Geiraráðstefnur af þessu tagi eru haldnar annað hvert ár og skiptast aðildarfélögin á að hýsa þær. Dagskrá hófst eftir hádegi á mánudegi með setningu og svokölluðum landsskýrslum, þar sem fulltrúar hvers félags fóru yfir stöðu efnahagsmála, kjaramála og stjórnmála í sínu landi. Á þriðjudeginum hófst dagskráin með kynningu á ítarlegri samanburðarkönnun á kjarasamningum öryggisvarða á Norðurlöndum. Efling átti veg og vanda af framkvæmd könnunarinnar, og var það starfsmaður Eflingar Eleonora Maximciuc sem flutti kynninguna. Sama dag var einnig fjallað um tækniþróun í öryggisvörslugeiranum, þar á meðal notkun gervigreindar, auk þess sem þrír norrænir fræðimenn sem starfa við rannsóknir tengdar málefnum geirans fluttu erindi. Viðar Þorsteinsson sviðsstjóri fræðslu- og félagsmála hjá Eflingu stýrði pallborðsumræðum með fyrirlesurunum. Á miðvikudeginum hófst dagskrá með kynningu frá Adam Fishwick, aðjúnkt við stjórnmálafræðideild Háskóla Íslands, þar sem hann sagði frá rannsóknum sínum á endurnýjun stéttarfélaga (union renewal) en í rannsóknarverkefninu beinir hann sjónum sérstaklega að Eflingu. Að því búnu flutti Mark Bergfeld frá UNI Europa erindi í gegnum fjarfundabúnað um hagsmunagæslu öryggisvarða á Evrópuvettvangi. Síðdegis var farið í skoðunarferð um hið sögufræga virki Svíaborg (Sveaborg – Suomenlinna) rétt utan við Helsinki. Dagskrá lauk fyrir hádegi á fimmtudegi með umfjöllun um skipulagið á þjálfun og vottun öryggisvarða á Norðurlöndum, þar sem hvert og eitt félag flutti ítarlega kynningu um þær kröfur sem gerðar eru um starfsþjálfun stéttarinnar í viðkomandi landi. Viðar Þorsteinsson og Sigrún Björg Guðmundsdóttir starfsmenntafulltrúi hjá Eflingu fluttu kynningu fyrir hönd Eflingar og tóku þátt í umræðum. Í umfjöllun ráðstefnunnar um starfsmenntamál kom berlega í ljós hversu langt á undan Íslandi hinar Norðurlandaþjóðirnar eru í þeim málaflokki þegar kemur að störfum öryggisvarða. Á öllum Norðurlöndunum utan Íslands eru gerðar kröfur til öryggisvarða um tiltekna þjálfun og menntun, sem yfirleitt er að finna í lögum. Þá hafa aðilar vinnumarkaðarins unnið náið saman að útfærslu námsbrauta og viðurkenningar á þjálfun. Einna lengst hefur verið gengið í Svíþjóð, þar sem stéttarfélagið Transport hefur ásamt samtökum öryggisvarðafyrirtækja sett á fót öfluga stofnun, BYA, sem heldur utan um öll starfsmennamál og önnur fagleg mál geirans. Fjöldi tækifæra gafst til samskipta og tenglamyndunar í hléum, sameiginlegum máltíðum og annarri óformlegri samveru. Óhætt er að segja að starfsmenn og forysta Eflingar hafi snúið heim af ráðstefnunni klyfjuð af fróðleik, samböndum og gagnlegum upplýsingum um fyrirmyndir þegar kemur að starfsþróunarmálum í öryggisvarðageiranum. Næsta verkefni félagsins er að byggja á þessari vinnu í samtölum við öryggisverði sjálfa, fyrirtæki þeirra, fræðsluaðila og hið opinbera. Sendinefnd Eflingar á ráðstefnunni var skipuð eftirtöldum: Atli Antonsson, verkefnisstjóri í félagsmálum Eleonora Maximciuc, ráðgjafi í vinnuréttindum Sigrún Björg Guðmundsdóttir, starfsmenntafulltrúi Viðar Þorsteinsson, sviðsstjóri fræðslu- og félagsmálasviðs Þórir Jóhannesson, varaformaður Eflingar og trúnaðarmaður hafnarverkamanna hjá Samskip Félögin sem áttu fulltrúa á ráðstefnunni til viðbótar við Eflingu voru þessi: Norsk arbeidsmandsforbund (NAF) frá Noregi. Félagið gerir einnig kjarasamninga fyrir ræstingafólk og hefur Efling einnig átt samstarf við ræstingadeild félagsins á vettvangi SUN. VSL frá Danmörku. Félagið semur eingöngu fyrir öryggisverði og er eina slíka félagið á Norðurlöndunum. PAM frá Finnlandi. Líkt og NAF semur PAM einnig fyrir ræstingafólk og er aðili að ræstingadeild SUN. Transportarbetareförbundet frá Svíþjóð, í daglegu tali kallað Transport. Félagið gerir kjarasamninga fyrir vörubílstjóra, hafnarverkamenn og fleiri stéttir í samgöngugeiranum.

Mynd Sebastians Wójcik af tófu, tekin á Hesteyri í Jökulfjörðum, er mynd ársins í ljósmyndasamkeppni Eflingar árið 2026. Myndin sýnir tófuna, í miklu návígi við ljósmyndarann, standa íhugula og hálf glottandi í fjörunni á Hesteyri, starandi á Sebastian með gulleitum glyrnum sínum. Þema keppninnar í ár, sem og fyrri ár, var frí innanlands. Gæði myndanna sem bárust voru afar mikil og viðfangsefnin margþætt. Þó má segja dýralíf og náttúrufegurð hafi verið mest áberandi þráðurinn, og það ekki að ósekju enda Ísland stórbrotið og bæði flóra landsins og fána fagrar. Tugir mynda bárust frá félögum í Eflingu og var val dómnefndar síður en svo auðvelt. Af þeim sökum varð niðurstaða dómnefndar að lokum að veita einnig verðlaun fyrir 4. sæti en alla jafna hafa bara verið veitt verðlaun fyrir þrjú efstu sætin. Veitt eru peningaverðlaun til verðlaunahafa, 50 þúsund krónur fyrir fyrsta sæti en 25 þúsund krónur fyrir sæti 2.-4. Niðurstaða dómnefndar er eftirfarandi: sæti: Sebastian Wójcik. Brosandi tófa , tekin á Hesteyri sæti: Paweł Cieślikiewicz. Kría á veiðum , tekin í Jökulsárlóni sæti: Karolina Zyzik. Blæbrigði hins græna Íslands , tekin í Þórsmörk sæti: Mark Stache. Hestar og blóm . Auk vinningsmyndanna má sjá hér að neðan fjölda mynda sem fengu sérstakar heiðurstilnefningar frá dómnefnd. Hluti myndanna verður hengdur upp í orlofshúsum Eflingar þar sem félagsfólk fær að njóta þeirra. Efling óskar vinningshöfum innilega til hamingju og þakkar öllum sem tóku þátt í keppninni.

Stjórn Eflingar lýsir yfir samstöðu með sendlum hjá fyrirtækinu Wolt sem sýndu mikið hugrekki með mótmælaaðgerðum í vikunni vegna bágra kjara. Störf sendla hjá Wolt og öðrum sambærilegum fyrirtækjum eru launavinna. Laun og réttindi eiga því að vera í samræmi við íslenska kjarasamninga. Efling fordæmir það að verkafólk sé svikið um lágmarkskjör og þess í stað látið vinna undir skilmálum gerviverktöku. Efling hefur á síðastliðnum misserum átt í samskiptum við Wolt sendla á Íslandi sem leitað hafa til félagsins. Jafnframt hefur félagið kynnt sér baráttu stéttarfélaga og sendla á Norðurlöndum gagnvart sendlafyrirtækjum, meðal annars í Noregi og í Finnlandi. Félagið er tilbúið að styðja baráttu Wolt sendla á Íslandi fyrir bættum kjörum og vill beita sér fyrir viðurkenningu á stöðu þeirra sem launamenn. Wolt sendlum er velkomið að hafa samband við félagið með því að senda tölvupóst á netfangið efling@efling.is .

Stjórn Eflingar hefur samþykkt að gera veigamiklar endurbætur á starfsemi skrifstofu félagsins á næstu mánuðum. Breytingar voru kynntar á starfsmannafundi 2. september, en allir starfsmenn halda starfi sínu og verður stöðugildum fjölgað nokkuð með breytingunum. Inntak breytinganna er þetta helst: Nýtt Lögfræðisvið heldur utan um innheimtumál og verða þar til tvö ný störf lögfræðings og lögfræðifulltrúa. Sviðið heyrir undir framkvæmdastjóra. Nýtt svið Vinnumarkaðs- og félagsmála mun hafa með höndum hagsmunagæslu félagsfólks gagnvart atvinnurekendum, þar með talið kjaraviðræður, málavinnslu og stuðning við trúnaðarmenn. Ný störf sem verða til eru m.a. stöður lögfræðings og greinanda. Sviðið heyrir undir formann. Svið vinnuréttinda og fræðslu- og félagsmála verða lögð niður. Nýtt Rekstrarsvið mun halda utan um öll helstu sameiginleg rekstrarmál skrifstofunnar. Samhliða stofnun sviðsins verður ráðinn mannauðsfulltrúi í fullu starfi. Sviðið heyrir undir framkvæmdastjóra. Nýjar og ómannaðar stöður verða auglýstar til umsóknar en samhliða breytingunum verða eftirfarandi mannabreytingar innanhúss: Rínar Magnússon fráfarandi sviðsstjóri Þjónustusviðs tekur við starfi sviðsstjóra Rekstrarsviðs. Sigrún Helga Kristjánsdóttir tekur í stað Rínars við stöðu sviðsstjóra Þjónustusviðs. Viðar Þorsteinsson tekur við starfi sviðsstjóra Vinnumarkaðs- og félagsmálasviðs.  Nýráðningar auk þjálfunar og undirbúnings munu ná yfir næstu mánuði. Stefnt er á að breytingarnar verði að fullu innleiddar eigi síðar en næstu áramót. „Þessar breytingar hafa verið lengi í gerjun og lít ég á þær sem lokahnykkinn í vegferð sem við hófum árið 2022. Breytingunum er ætlað að efla tengsl starfseminnar hér á skrifstofunni við félagsfólk og styðja betur við valdeflingu þeirra. Ég fagna því líka sérstaklega að með auknum umsvifum öðlumst við getu til að innvista verkefnum og auka þannig hagræðingu í meðförum fjármuna félagsins,“ sagði Sólveig Anna Jónsdóttir formaður Eflingar.

Miðasala á Mat og menningu, árlega matar- og menningarhátíð Eflingar, hefst í dag, mánudaginn 14. september, klukkan 12:00. Hátíðin verður haldin í fjórða sinn sunnudaginn 27. september í Félagsheimili Eflingar, Guðrúnartúni 1. Þar geta gestir notið fjölbreyttra rétta frá ólíkum heimshornum, eldaðra af Eflingarfélögum. Takmarkað magn miða er í boði , svo við hvetjum fólk til að tryggja sér miða sem fyrst. Miðasalan fer fram á Mínum síðum Eflingar.