Nýtt nám fyrir starfsfólk í matvælavinnslu!

Tilraunakennsla á næsta leyti

Síðustu mánuði hefur Starfsafl leitt vinnu við undirbúning að nýju námi í matvælavinnslu í samstarfi við Rannsóknaþjónustuna Sýni ehf og  Eflingu stéttarfélag.  Myndaður hefur verið vinnuhópur sem í eiga sæti, auk Eflingar, Starfsafls og Sýni ehf, fulltrúar Matvælastofnunar, Landsmenntar og Fræðslumiðstöðar atvinnulífsins.  Byggt er á námskeiðum og námsefni frá Rannsóknaþjónustunni Sýni sem hefur verið leiðandi í námskeiðahaldi fyrir starfsfólk í matvælaiðnaði.

Starfsmenn Sýnis hafa að undanförnu verið að vinna að drögum að námskrá og er það gert í samráði og samvinnu við Fræðslumiðstöð atvinnulífsins og undirbúningshópinn.  Starfsmenn Sýnis hafa mikla reynslu á þessu sviði, ekki síst með sveigjanlegri kennslu sem fellur að vinnsluferlum fyrirtækja.  Ætlunin er að bjóða upp á 45 kennslustunda grunnnám, dreift yfir lengra tímabil, ætlað starfsfólki í matvælavinnslu, að viðbættum 15 kennslustunda sérhæfðu námi sem fer eftir fagsviði starfsmanna.  Sem dæmi námsgreinar í grunnnáminu má nefna matvælaeftirlit, matvælavinnslu, örveruvarnir og innra eftirlit.  Sérhæft 15 stunda nám fylgir svo í kjölfar grunnnáms þar sem farið verður í atriði sem eru bundin hverri grein.  Til dæmis má nefna greinar eins og brauð- og kökugerð, mjólkurvinnslu, fiskvinnslu, kjötvinnslu, korn- og fóðurvinnslu og fleiri greinar. 

Sem fyrr segir er námskráin í vinnslu en vonir standa til að fara af stað með tilraunakennslu fljótlega sem yrði í höndum Rannsóknaþjónustunnar Sýnis.  Þeir lærdómar sem fást við tilraunakennsluna verða síðan nýttir til að gera lokaútgáfu námskrárinnar sem yrði undir yfirumsjón Fræðslumiðstöðvar atvinnulífsins.

Processing...
Thank you! Your subscription has been confirmed. You'll hear from us soon.
Barátta fyrir betra lífi.
Vertu áskrifandi að fréttaskeyti Eflingar. Fáðu ferskar fréttir af baráttunni og réttindum þínum í tölvupósti.
ErrorHere