– segir Sveinn Aðalsteinsson, framkvæmdastjóri Starfsafls
Það er alltaf mikil gerjun í starfsmenntamálunum, ekki bara við breytingar á styrkjum, heldur líka nýjar leiðir og aðferðir við að miðla námi og kortleggja þekkingu félagsmanna. Raunfærnimatið, það að meta þekkingu á ákveðnum sviðum sem myndast við starfsreynslu, er sífellt að verða öflugra og ná til fleiri atvinnugreina. Til dæmis má nefna að Mímir var að raunfærnimeta hóp starfsmanna vöruhúsa og námskrá er ætluð þeim hópi sem var verið að tilraunakenna. Starfsafl styrkti þessi verkefni og gaman að sjá hversu vel hefur tekist til. Þetta segir Sveinn Aðalsteinsson en hann segir í viðtali við Eflingarblaðið að það séu sannarlega spennandi tímar framundan, ekki síst með nýjum samningi Flóans og SA þar sem myndarlega er tekið á starfsmenntamálunum.Í nýjum kjarasamningi Flóans og Samtaka atvinnulífsins er tekið myndarlega á starfsmenntamálum, fyrir utan mat á starfsmenntun inn í laun þá lofar ríkið að taka upp hugmyndir um fagháskóla sem myndi henta fólki með mikla starfsreynslu eins og okkar fólki. Það skiptir þá öllu máli að horft sé til starfsreynslu og hagnýtrar þekkingar en minna horft á formlegar námsgráður.Það var einmitt verið að útskrifa nokkra Eflingarfélaga, sem starfa á starfsvæði Eflingar fyrir austan fjall, úr námi sem Háskólafélag Suðurlands bauð upp á sl. vetur í matvælafræðum, sérstaklega nýsköpun og markaðsmálum. Námið er bæði ætlað starfsmönnum í matvælafyrirtækjum sem vilja auka hæfni sína og möguleika til frama í starfi og þeim sem hafa áhuga á að fá menntun og þjálfun til að eiga góða möguleika á starfi í matvælageiranum. Námið getur einnig verið mikilvægt skref fyrir þá sem hyggja á frekara nám í matvælatengdum greinum í framtíðinni. Í náminu er fléttað saman bóklegri kennslu ásamt vistun í fyrirtækjum þar sem unnið er með raunhæf verkefni og lýkur með lokaverkefni þar sem nemendur velja raunhæft viðfangsefni, segir hann.Nemendur hafa verið mjög ánægðir með þetta nám og ég sé nám af þessu tagi fá meira pláss innan framhaldsfræðslunnar. Vonandi er hægt tengja svona nám við hugmyndir um fag-háskóla, sagði Sveinn að lokum.Sveinn Aðalsteinsson er framkvæmdastjóri Starfsafls fræðslusjóðs. Starfsafl styrkir bæði einstaklinga og fyrirtæki til starfsmenntunar og er í eigu Flóabandalagsins og Samtaka atvinnulífsins.
