Um fimmtíu fulltrúar frá Eflingu stéttarfélagi sitja nú 42. þing ASÍ sem hófst 26. október og stendur yfir í þrjá daga. Yfirskrift þingsins í ár er Samstaða í 100 ár – sókn til nýrra sigra og á það vel við þar sem ASÍ var stofnað fyrir 100 árum síðan og hefur allt síðan þá barist fyrir bættum kjörum launafólks. Fulltrúar frá stéttarfélögum innan ASÍ alls staðar á landinu taka þátt og móta þar stefnu ASÍ til næstu ára. Á dagskrá þingsins eru mjög mikilvæg mál og ber þar hæst umræða um nýtt samningslíkan að norrænni fyrirmynd en í dag eru pallborðsumræður í sal með formönnum stjórnmálaflokkanna um samhengið á milli efnahagslegs- og félagslegs stöðugleika. Síðasta dag þingsins verður svo forysta ASÍ kosin.
Inn á heimasíðu ASÍ er hægt að sjá ræður fyrirlesara ásamt fleiri upplýsingum um þingið.
