Verkfallsvakt Eflingar varð vör við eitt verkfallsbrot á vinnustað Reykjavíkurborgar í dag, miðvikudaginn 12. febrúar. Verkfallsbrotið fólst í því að deildarstjóri á leikskóla er talinn hafa gengið í störf Eflingarstarfsmanns. Brotið hefur verið tilkynnt stjórnendum Skóla- og frístundasviðs Reykjavíkurborgar.
Verkfallsvaktin heimsótti hátt í 60 vinnustaði borgarinnar á þremur bílum. Sérstök áhersla var lögð á verkfallsvörslu í grunnskólum borgarinnar að þessu sinni. Þá verður litið inn á nokkra vaktavinnustaði seinnipartinn í dag og kvöld.
Verkfallsverðir fengu hlýjar móttökur á vinnustöðum borgarinnar og er ljóst að mikill stuðningur er við baráttu félagsmenna í stéttarfélaginu meðal annars starfsfólks borgarinnar og almennings.Efling býður áhugasömum félagsmönnum í verkfalli að taka þátt í verkfallsvörslunni á morgun og í næstu viku með því að senda tölvupóst á felagssvid@efling.is
Við þökkum kærlega fyrir góðar móttökur og fyrir þann samhug sem starfsfólk frá öðrum stéttarfélögum, foreldrar barna og notendur þjónustu sem hefur skerst hafa sýnt.