Samninganefnd Eflingar – stéttarfélags við SORPU undirritaði gær, fimmtudaginn 1. október 2020, nýjan kjarasamning við byggðasamlagið sem rekið er af þremur sveitarfélögum á höfuðborgarsvæðinu. Samningurinn fylgir í meginatriðum kjarasamningi Eflingar við Reykjavíkurborg og er gildistími hans frá 1. apríl 2019 til 31. mars 2023.

Með samningnum hækka laun Eflingarfélaga hjá SORPU um á bilinu 100 til 113 þúsund krónur á samningstímanum miðað við fullt starf. Hækkunum umfram 90 þúsund króna taxtahækkun að fyrirmynd almenna vinnumarkaðarins er náð fram með innleiðingu nýrrar launatöflu líkt og hjá Reykjavíkurborg. Er það í samræmi við hugmyndafræði gildandi kjarasamninga um sérstakar krónutöluhækkanir lægstu launa.

Í samningnum eru ákvæði um styttingu vinnuvikunnar bæði hjá dagvinnu- og vaktavinnufólki, að hluta háð nánari útfærslu í samráði við starfsfólk líkt og í öðrum kjarasamningum við ríki og sveitarfélög.

Gerðar verða afturvirkar leiðréttingar á launum vegna hækkana 1. apríl 2019 og 1. apríl 2020 að frádreginni innágreiðslu sem greidd var meðan á kjaraviðræðum stóð.

Samningurinn verður nú borinn undir atkvæði félagsmanna og ber Eflingu að tilkynna niðurstöðu fyrir 23. október næstkomandi. Tekur samningurinn gildi nema félagsmenn felli hann í atkvæðagreiðslu. Fer nú í hönd vinna við að kynna samninginn fyrir félagsmönnum sem starfa munu undir honum en þeir eru um 70 talsins.

Samningurinn er einn af fjölmörgum kjarasamningum sem Efling gerir við launagreiðendur sem heyra ekki beint undir stjórnsýslu ríkis eða sveitarfélaga en eru fjármagnaðir af almannafé. Slíkir samningar eru gerðir á grundvelli samninga Eflingar við ríkið, Reykjavíkurborg og sveitarfélögin og yfirleitt undirritaðir fljótlega í kjölfar þeirra.

Sólveig Anna Jónsdóttir, formaður Eflingar, sagði í tilefni af undirritun samningsins: „Ég fagna því innilega að búið sé að undirrita þennan kjarasamning. Með eðlilegum samningsvilja ná aðilar saman þótt það kunni að taka tíma.“

Sjá kjarasamning hér.

Processing...
Thank you! Your subscription has been confirmed. You'll hear from us soon.
Barátta fyrir betra lífi.
Vertu áskrifandi að fréttaskeyti Eflingar. Fáðu ferskar fréttir af baráttunni og réttindum þínum í tölvupósti.
ErrorHere