Efling stéttarfélag óskar félagsfólki sínu og landsmönnum öllum gleðilegs þjóðhátíðardags, 17. júní.
Efling vill minna félagsmenn sína sem eru við vinnu í dag á að 17. júní er stórhátíðardagur og skal greiða laun fyrir vinnu í dag með stórhátíðarálagi. Þá hvetur Efling íslenska félagsmenn sína til að vekja athygli erlendra félaga sinna á því einnig.
Í tilefni lýðveldisstofnunarinnar 1944 var efnt til ljóðasamkeppni þar sem tvö ljóð voru verðlaunuð. Annað þeirra var Hver á sér fegra föðurland eftir Huldu, Unni Benediktsdóttur Bjarklind, en hitt var Íslendingaljóð 17. júní, sem alla tíð hefur þó verið nefnt eftir upphafsorðum ljóðsins, Land míns föður. Það orti Jóhannes úr Kötlum.
Jóhannes úr Kötlum var Dalamaður, fæddur og uppalinn í Laxárdal. Hann var virkur í starfi Sameiningarflokks Alþýðu – Sósíalistaflokksins, og var alþingismaður Reykvíkinga árið 1941. Hann var þá virkur í starfi Samtaka hernámsandstæðinga.
Um Jóhannes úr Kötlum sagði höfuðskáldið Jón úr Vör í viðtali í Birtingi árið 1957: „Hann tekur strax forustuna sem ljóðskáld verkalýðsins, hjartahlýr og samúðarríkur, heitur baráttumaður réttlætismála. Form laust eða bundið eftir því sem við átti í stríði mikilla tíma. Aldrei gleymi ég skáldskap hans á kreppuárunum. Síðan þá þykir mér vænst um Jóhannes úr Kötlum allra skálda.“
Það er því við hæfi á þessum þjóðhátíðardegi, 81 ári frá lýðveldisstofnun, að birta hér ljóð Jóhannesar.
Land míns föður
Land míns föður, landið mitt
laugað bláum straumi
eilíft vakir auglit þitt
ofar tímans glaumi.
þetta auglit elskum vér,
- Ævi vora á jörðu hér
brot af þínu bergi er,
blik af þínum draumi.
Hvort sem krýnist þessi þjóð
þyrnum eða rósum
hennar sögur, hennar ljóð,
hennar líf vér kjósum.
Ein á hörpu ísa og báls
aldaslag síns guðamáls
æ hún leiki ung og frjáls
undir norður ljósum.