Ný rannsókn sýnir svart á hvítu að Eflingarfélagar eru með lang lægstu tekjurnar á íslenskum vinnumarkaði. Fast að helmingur Eflingarfélaga hefur heildar atvinnutekjur undir 500 þúsund krónum á mánuði, meira en tvöfalt hærra hlutfall en hjá öðru launafólki innan ASÍ og BSRB.
Himinn og haf er milli atvinnutekna Eflingarfélaga borið saman við félaga í öðrum aðildarfélögum ASÍ og BSRB. Hlutfall þeirra félagsmanna í hinum aðildarfélögunum sem hafa atvinnutekjur undir 500 þúsund krónum er þannig 22 prósent á meðan að hlutfallið hjá Eflingarfélögum er 42 prósent.
Dæmið snýst síðan við þegar hærri tekjuhópar eru skoðaðir, þar sem sárafáir Eflingarfélagar hafa atvinnutekjur yfir eina milljón, en fast að fjórðungur félagsmanna í öðrum aðildarfélögum heildarsamtakanna tveggja.
80 prósent Eflingarfélaga eru í lægstu tekjuhópunum
Þetta er meðal niðurstaða sem lesa má í nýrri skýrslu Vörðu, rannsóknastofnunar vinnumarkaðarins, um stöðu launafólks á Íslandi. Varða hefur árlega síðustu fimm ár lagt fyrir sambærilega könnun meðal launafólks. Efling fékk Vörðu til að framkvæma sérvinnslu úr gögnunum fyrir stéttarfélagið og er vitnað í þá skýrslu hér.
Áberandi er hversu hátt hlutfall Eflingarfélaga er í lægri tekjuhópum samanborið við félagsfólk í öðrum stéttarfélögum. Þannig hafa 37 prósent Eflingarfélaga mánaðartekjur á bilinu 500-749 þúsund krónur, borið saman við 30 prósent meðal annars launafólks innan ASÍ og BSRB.
Eftir því sem tekjurnar hækka snúast þessi hlutföll skarpt við. Þannig hafa 14 prósent Eflingarfélaga atvinnutekjur á bilinu 750-999 þúsund krónur, borið saman við 25 prósent annars launafólks.
Aðeins 7 prósent Eflingarfélaga hafa heildartekjur yfir eina milljón króna á mánuði. Það er mun lægra hlutfall en meðal félaga í öðrum aðildarfélögum innan ASÍ og BSRB, þar sem 23 prósent allra þeirra félagsmanna hafa atvinnutekjur yfir eina milljón króna á mánuði. Munurinn eykst enn ef horft er á þá sem hafa hærri tekjur. Alls 10 prósent félagsmanna innan ASÍ og BSRB hafa tekjur yfir 1,25 milljónir á móti 2 prósentum Eflingarfélaga.
Lág laun endurspeglast í lakari fjárhagsstöðu
Í þessu ljósi þarf ekki að koma á óvart að fjárhagsstaða Eflingarfélaga er markvert lakari en fjárhagsstaða annars launafólks. Fjórir af hverjum tíu Eflingarfélögum búa þannig við skort, eða verulegan skort, á efnislegum og félagslegum gæðum. Það birtist í mun lakari stöðu Eflingarfélaga á húsnæðismarkaði, minni sparnaði og hærra hlutfalli sem hefur skammtímaskuldir.
Þá hefur stór hluti Eflingarfélaga sem eiga börn ekki fjárhagslegt svigrúm til að greiða fyrir grunnþætti fyrir börn sín, eins og tómstundir eða útgjöld tengd námi þeirra.
Niðurstöður könnunar Vörðu sýna hversu djúp gjá er milli verkafólks og annarra hópa á íslenskum vinnumarkaðir. Nánar verður fjallað um fjárhagsstöðu Eflingarfélaga, sem og aðrar niðurstöður könnunar Vörðu, á næstu dögum á vefsíðu Eflingar stéttarfélags.