Flóinn og Boðinn vilja samning til tveggja ára

Áherslan á kaupmátt og hækkun lægstu launa

Megináherslan verður á hækkun lægstu launa og kaupmáttaraukningu í komandi kjarasamningum, segir Sigurður Bessason, formaður samninganefndar Flóafélaganna og Boðans eftir fund með Samtökum atvinnulífsins í dag þar sem helstu stefnumið félaganna voru kynnt. Í gærkvöldi samþykkti aðalsamninganefnd félaganna almenna stefnumörkun þar sem gert er ráð fyrir að stjórnvöld tryggi stöðugleika og lækkandi verðbólgu til að launahækkanir skili sér í auknum kaupmætti. Flóafélögin vilja semja til tveggja ára með traustum tryggingarákvæðum gagnvart verðbólgu og launum annarra.

     Stéttarfélögin vilja tryggja umframleiðréttingu til þeirra hópa sem dregist hafa aftur úr á yfirstandandi samningstímabili,  færa taxta að greiddu kaupi og tryggja þar með öryggisnetið.
    Launafólk á almennum markaði á ekki eitt og sér að bera ábyrgð á stöðugleikanum. Ábyrg stefna stjórnvalda er varðar lækkun á verðbólgu og almennan stöðugleika er forsenda þess að launahækkanir skili sér í auknum kaupmætti.  
     Áhersla verði lögð á að útrýma launamun kynjanna, en fram hefur komið að óútskýrður launamunur innan félaganna er ennþá fyrir hendi og þessum mun vilja stéttarfélögin útrýma með markvissum aðferðum í samstarfi við atvinnurekendur.
Unnið skal að því að stytta heildarvinnutímann á samningstímabilinu en fram hefur komið í viðhorfskönnun Flóafélaganna að launafólk leggur þunga áherslu á að stytta vinnutímann sem er allt of langur. 
     Félögin vilja ræða við Samtök atvinnurekenda um hvernig bæta megi veikinda-, slysa-, lífeyris- og örorkuréttindi á almennum markaði.  Ákvæði um slysatryggingar verði teknar til heildarendurskoðunar og tryggingaupphæðir verði stórhækkaðar til samræmis við það sem best gerist í samningum hér á landi.
    Tryggja ber stöðu starfsmenntasjóðanna með hækkun á framlagi til starfsmenntasjóða til að standa undir auknum kröfum um menntun launafólks. 
    Krafist er skýrra opnunarákvæða vegna verðbólgu og launahækkana annarra hópa.  Aðeins þannig verður tryggt að svigrúm í atvinnulífinu komi til skipta fyrir allan almenning en ekki  bara til útvalinna hópa.  Almennt launafólk sættir sig ekki við að sitja eftir í launaþróun í þjóðfélaginu.
    Umræða um samningstíma fari fram um leið og viðræður eiga sér stað um kaupliði.  Stefnt verði að samningi til tveggja ára.  

 

Processing...
Thank you! Your subscription has been confirmed. You'll hear from us soon.
Barátta fyrir betra lífi.
Vertu áskrifandi að fréttaskeyti Eflingar. Fáðu ferskar fréttir af baráttunni og réttindum þínum í tölvupósti.
ErrorHere