Hækkun ábata og launaflokka hjá Samskipum

Samtök atvinnulífsins fyrir hönd Samskipa hafa fallist á 28% hækkun svokallaðs ábata, sem er sérgreiðsla ofan á hverja unna klukkustund í vinnustaðasamningi Eflingar vegna hafnarverkamanna og bílstjóra hjá Samskip.

Ein meginkrafa hafnarverkamanna og bílstjóra hjá Samskip í kjaradeilu Eflingar við SA var hækkun á ábatanum, sem hefur rýrnað miðað við launaþróun yfir árabil.

Ábatinn hækkar samkvæmt þessu um 28% frá fyrri upphæð og verður samkvæmt þessu 225 kr. á klukkustund.

Einnig er launaflokkur bílstjóra hjá Samskipum með réttindi til aksturs með hættuleg efni (ADR) hækkaður um einn, úr launaflokki 13 í 14.

Umræddar breytingar eru með fyrirvara um samþykki á miðlunartillögu ríkissáttasemjara sem kynnt var í dag.